Dinko Kovačić 
Zdravi i veseli bili
Zdravi i veseli bili
| Zdravi i veseli bili |
|
Jedan dan bija sam u Parizu. Sam. Kružija sam, kružija, od Defancea do Louvra, pa Jelisejskim poljima sve do Slavoluka pobjede. Umoria sam se ka pas. Mislim se, sist ću na prvi štekat i napisat ću kartoline. Najprije me niko nije obadava, a onda se dovuka jedan dugi, blidi nosonja. Napeja se poviše mene, ja sam se slega, mučin ja francuski, muči on hrvatski, gleda on francuski, pogledan ga ja hrvatski i dobro je što nisam zna francuski. Kartoline sam napisa na pragu od jednoga starinskoga, rikamanog prozora, a one su odma, ka jato bili tići, poletile ravno u Split. Ja sam opet kružia, kružia, a onda sam se spazija da se eto skoro i smračilo, a ja cili dan nisam pozdravija niti jednoga čovika. Ljudi moji, oti judi, crni, bili, šareni, niki su liši, a niki pigavi. Miljun ljudi, a niti jedan čovik. Iz daleka kako tako, a kad se približi, ka da se razvodni i ne da ti da ga pozdraviš. Otuđenje je pogubno za ljude, promislija sam. Dosta mi je ove, nadaleko čuvene, Pariške osamostaljene lipote. Triba poć doma. Eto ovde sam, i još do danas nisu mi jasne dvi stvari: Ono tamo, jesi li ono ljudi ili ribe, i još ne znam, ono kad sam bia utira majicu u gače, jeli mi bilo zima ili mi je bija samo lad u duši. Bila je jedna subota oko jedanajst uri. Sidnemo na štekat isprid Automata Jakša Fjamengo (svi ga znate) i ja. Ma kako smo sili, odma je doša oni moj Čiki i donija mi onu moju kafu. A onda je bilo ovako: Evala, Bog, kako si, pozdravi doma, adio... A ja san reka Jakši: “Jo lipo li je na ovu našu Pjacu. Ovde cili dan možeš bit čovik.” Eto ti Splite naš, kad si takvi, ko te može ne volit. Zdravi i veseli bili. (Dinko Kovačić, pri primanju nagrade za životno djelo grada Splita, HNK, 2004.) |
